ناوه‌ڕۆك
سەرەتا
سەرئێشەی دوای منداڵبوون بەرگەگرتنی قورسە چونکە خانمەکە تازە بووەتە دایک و بە هۆی ئەرکی دایکایەتی و ئازاری منداڵبوونەکەیەوە زۆرتر ماندوو دەبێت، لێکۆڵینەوەکان ئەوەیان دەرخستووە کە ٪٣٩ـی خانمان لە هەفتەی یەکەمی دوای منداڵبوون تووشی سەرئێشە دەبن، وە ئەگەریش بێت و دوای منداڵبوون دایکەکە تووشی سەرئێشە ببێت ئیتر هەر جۆرێکی بێت، شەقیقە، یاخود هێشوویی و یاخود بە هۆی ماندوویەتییەوە بێت، ئەمانە هەموو زیاتر دایکەکە ئازار دەدەن.
دەکرێت لەگەڵ سەرئێشەکەدا خانمەکە ئەم نیشانانەی لەگەڵدا بێت
هۆکاری سەرئێشە دوای منداڵبوون
- گۆڕانکاری هۆڕمۆنەکان: هۆڕمۆنی ئیسترۆجین لە خانماندا دوای منداڵبوون بە شێوەیەکی بەرچاو دادەبەزێت، هەر ئەمەشە دەبێتە هۆی زیادبوونی ئەگەری توشبوون بە خەمۆکی دوای منداڵبوون.
- پەستانی دەروونی.
- کەمبوونەوەی خەو.
- ماندوویەتی بەردەوام.
- لەدەستدانی ئاوی جەستە.
هەندێک کات سەرئێشەی دوای منداڵبوون نیشانەیەکە بۆ بارودۆخێکی مەترسیدار و جدی وەک
- بەرزی پەستانی خوێن.
- هەوکردنی پەردەکانی مێشک.
- بوونی گرێ لە سەردا.
- سەرئێشە بە هۆی دەرمانی سڕکردنەکەوە لە کاتی منداڵبووندا.
- وەڵامدانەوەی جەستە بۆ دەرمانێکی دیاریکراو.
ڕێگریکردن لە سەرئێشەی دوای منداڵبوون
دوورکەوە لە هۆکارەکان
بزانە ڕۆژانە چ هۆکارێک سەرئێشەکەت زیاتر دەکات لێی دوورکەوەرەوە وەک، خۆراک، ڕووناکی یاخود هەر کارێکی دیکە بێت کە دەیکەیت.
سیستەمی خۆراکی
برسییەتی و کەمیی شەکری ناو خوێن و کەمیی ئاوی جەستە هۆکارێکن بۆ سەرئێشە، هەر بۆیە لە کاتی خۆیدا خواردنی باش بخۆ و مەهیڵە برسی ببیت و ئاوی زۆر بخۆرەوە تاکوو جەستەت بە شێداری بمێنێتەوە، ڕۆژانە سێ ژەم خۆراک و لە نێوان ژەمەکانیشدا سووکە ژەم بخۆ و هەروەها هەمیشە با ئاوت لە لادا بێت و ئاویش زۆر بخۆرەوە.
پشوودان
ڕاستە دوای منداڵبوون و بوونی منداڵێک و ئەرکی دایکایەتی پشوودان قورسە، بەڵام هەوڵبدە کاتێک منداڵەکەت دەخەوێت تۆش بخەوویت و پشوو بدەیت و دەکرێت هەندێک جار داوای یارمەتی بکەیت لە هاوسەر و خێزانەکەت بۆ یارمەتیدانت.
کەمکردنەوەی پەستانی دەروونی
هەر هۆکارێک بگرە بەر کە پەستانی دەروونیت لەسەر کەم دەکاتەوە، گوێگرتن لە قورئان یاخود مۆسیقا و گۆرانی، قسەکردن لەگەڵ خۆشەویستان و هاوڕێکانتدا، وەرزش و یۆگا، هەموو ئەمانە یارمەتیدەرن بۆ کەمکردنەوەی پەستانی دەروونی.
دانیشتنێکی گونجاو
زۆرجار بە هۆی ئازاری پشت و ملەوە تووشی سەرئێشەش دەبیت، کە ئەویش بە هۆی دانیشتنی هەڵە و پاڵکەوتنی هەڵەوە یاخود زۆر وەستان بە پێوە تووشی دەبیت، بۆیە گرنگە کە بزانیت بە چ جۆرێک دادەنیشیت و دەجوڵێیتەوە.
پارێزگاری لە چاوەکانت بکە
ماوەیەکی زۆر سەیری مۆبایل مەکە و کتێب مەخوێنەوە و چاوت ئازار مەدە چونکە ماندووبونی چاوەکان هۆکارێکە بۆ سەرئێشە.
شێوازی ژیانت ڕێکبخە
دوورکەوە لە کەم خەوتن و خواردنەوە کحولییەکان و جگەرە کێشان.
چارەسەری سەرئێشەی دوای منداڵبوون بەبێ دەرمان
پشوودان
دەنگ و هەموو ڕووناکییەکان بکوژێنەوە و لە ژوورێکی بێدەنگ و تاریکدا پشوو بدە، قاچەکانت بەرز بکەرەوە و چاوەکانت دابخە و کەمێک بخەوە.
ئاو بخۆرەوە و خۆراک بخۆ
بڕێکی زۆر ئاو و شلەمەنی بخۆرەوە تاکوو جەستەت بە شێداری بمێنێتەوە، هەروەها شتێک بخۆ تاکوو شەکری ناو جەستەت زیاد بکات ئەگەر ماوەیەک دەبێت کە هیچت نەخواردووە.
کافایین بخۆرەوە
کافایین دەتوانێت چارەسەرێک بێت بۆ سەرئێشە و لە هەندێک دەرمانیشدا بوونی هەیه، بۆیە دەتوانیت چا بخۆیتەوە یاخود قاوەیەک.
ئارامی بە خۆت بدە
پشوودان و وورزش و یۆگا و خۆشۆردن بە ئاوی گەرم دەتوانێت ماسولکەکانت خاو بکاتەوە و سەرئێشەکەت کەم بکاتەوە.
دانانی جەوەنەی سارد یان گەرم
لەو شوێنەی سەرتدا کە ئازارەکە هەیە، جەوەنەی گەرم یاخود سارد دابنێ.
داوای یارمەتی بکە
کاتێک سەرئێشەکەت زۆرە و ناتوانیت بە تەنها کارەکانی ڕۆژانە بکەیت و پێویستت بە چاودێرێکە، داوای یارمەتی بکە لە کەسانی نزیکت تاکوو یارمەتیت بدەن.
ئایا سەرئێشەی دوای منداڵبوون ئاساییە؟
سەرئێشەی دوای منداڵبوون بە تایبەت لە هەفتەکانی سەرەتادا زۆر باوە و حاڵەتێکی ئاساییه، دوای منداڵبوون گۆڕانکاری زۆر دێت بەسەر جەستە و دەروونی دایکەکەدا سەرئێشەش یەکێکە لەو گۆڕانکارییانە بە گرتنەبەری ڕێنماییەکان دەتوانیت زاڵ ببیت بەسەریدا و ئەگەر هات و سەرئێشەکەت زۆر زیاتر بوو و بە هیچکام لەو ڕێگایانە چاک نەبوو، سەردانی پزیشکی پسپۆڕ بکە.
چارەسەری سەرئێشەی دوای منداڵبوون بە دەرمان
هەندێک کات سەرئێشەکە زۆرە و بەبێ دەرمان چارەسەر نابێت، و هیچ ڕێگایەک سوودی نییە، بەڵام ئەمە جگە لە شەقیقە، لەم کاتەدا دەتوانیت چەند دەرمانێک بەکاربهێنیت، بەڵام دەبێت زۆر وریا بیت و بەبێ پرسی پزیشک بەکاری نەهێنیت بە تایبەت ئەگەر شیری خۆت دەدەیت بە منداڵەکەت.
دەتوانیت ئەم دەرمانانە بەکاربهێنیت:
- پاراسیتامۆڵ.
- ئیبۆپڕۆفین.
- ناپڕۆکسین.
چ کاتێک بۆ سەرئێشەی دوای منداڵبوون دەبێت بچیتە لای پزیشک؟
- سەرئێشەیەک کە بەرەو باشتر نەڕوات و خراپتر ببێت.
- سەرئێشەیەک کە بۆ ماوەی ٢٤ کاتژمێر بەردەوام بێت.
- تای لەگەڵ بێت.
- ڕەقبوونی مل.
- سەرگێژخوواردن.
- بەرچاو ڕەشبوون.
ئایا سەرئێشەی دوای منداڵبوون ئاساییە؟
سەرئێشەی دوای منداڵبوون بە تایبەت لە هەفتەکانی سەرەتادا زۆر باوە و حاڵەتێکی ئاساییه، دوای منداڵبوون گۆڕانکاری زۆر دێت بەسەر جەستە و دەروونی دایکەکەدا سەرئێشەش یەکێکە لەو گۆڕانکارییانە بە گرتنەبەری ڕێنماییەکان دەتوانیت زاڵ ببیت بەسەریدا و ئەگەر هات و سەرئێشەکەت زۆر زیاتر بوو و بە هیچکام لەو ڕێگایانە چاک نەبوو، سەردانی پزیشکی پسپۆڕ بکە.
